ފަސް މިލިއަން ގަސް އިންދުމުގެ މަޝްރޫއު: މިހާތަނަށް 2.4 މިލިއަން ގަސް އިންދައިފި

ސަރުކާރުން ފަށާފައިވާ ފަސް މިލިއަން ގަސް އިންދުމުގެ މަޝްރޫއުގެ ދަށުން، މިހާތަނަށް 2.4 މިލިއަން ގަސް އިންދައިފި އެވެ.

އެންވަޔަރަމަންޓް މިނިސްޓްރީ އިން އާންމުކޮށްފައިވާ އެންމެ ފަހުގެ މައުލޫމާތު ތަކުގައި ބުނެފައިވާ ގޮތުގައި، އޮކްޓޫބަރު މަހުގެ 22 ވަނަ ދުވަހުގެ ނިޔަލަށް ވަނީ 2،463،339 (ދެ މިލިއަން ހަތަރު ލައްކަ ފަސްދޮޅަށް ތިން ހާސް، ތިން ސަތޭކަ ތިރީސް ނުވަ) ގަސް އިންދައިފަ އެވެ.

އެ މިނިސްޓްރީ އިން ބުނެފައިވާ ގޮތުގައި މި މަޝްރޫއުގައި ރާއްޖޭގެ ރިސޯޓުތަކާއި، ރަށްތަކާއި ސިޓީތަކުގެ ކައުންސިލާއި، ސަރުކާރު ހިއްސާވާ ކުންފުނިތަކާއި، ސްކޫލްތަކާއި، ޕްރައިވެޓް ސެކްޓާ އާއި، ޖަމިއްޔާ ޖަމާއަތްތައް އަދި ގެސްޓް ހައުސްތަކުން ވެސް ވަނީ ބައިވެރިވެފައި އެވެ.

ސަރުކާރުގެ ކުންފުނިތަކުގެ ތެރެއިން އެންމެ ގިނަ ގަސް އިންދާފައި ވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި، މޯލްޑިވްސް ޕޯޓްސް ލިމިޓެޑް (އެމްޕީއެލް) އެވެ. މީގެ އިތުރުން ވެމްކޯ އާއި، ސްޓެލްކޯ އާއި، އެމްޑަބްލިއުއެސްސީ އަދި އެސްޓީއޯ ފަދަ ބޮޑެތި ކުންފުނިތަކުން ވެސް މި ޕްރޮގްރާމްގައި ބައިވެރިވެފައި އެވެ.