ސިވިލް ކޯޓުގެ ޤާޟީ އިޙުސާން އިސްތިއުފާ ދެއްވައިފި

ދިވެހިރާއްޖޭގެ ސިވިލް ކޯޓުގެ ޤާޟީގެ މަޤާމުގައި ހުންނެވި އަލްއުސްތާޛް ޢަބްދުﷲ އިޙުސާން މަޤާމުން އިސްތިއުފާ ދެއްވައިފި އެވެ.

ޤާޟީގެ މަޤާމުން އިޙުސާން އިސްތިއުފާ ދެއްވާފައިވާކަން ޖުޑީޝަލް ސާވިސް ކޮމިޝަން (ޖޭއެސްސީ) އިން ވަނީ ކަށަވަރު ކޮށްދީފައި އެވެ. ޖޭއެސްސީ އިން ބުނެފައި ވަނީ އިޙުސާންގެ އިސްތިއުފާގެ ސިޓީ ކޮމިޝަން އަށް ހުށަހަޅާފައި ވަނީ ބުދަ ދުވަހު ކަމަށެވެ. އިސްތިއުފާގެ ސިޓީ ހުށަހެޅުއްވި ދުވަހުން ފެށިގެން އިޙުސާން މަޤާމުން ވަކިވާނެ އެވެ.

ސިވިލް ކޯޓުގެ ޤާޟީގެ މަޤާމުން އިޙުސާން އިސްތިއުފާ ދެއްވާފައި މި ވަނީ އޭނާއާ ގުޅޭ މައްސަލައެއް ޖޭއެސްސީ އިން ތަޙުގީގު ކުރަމުން އަންނަނިކޮށެވެ. އޭގެ ކުރިން މިދިޔަ އޮގަސްޓު މަހުގެ ތެރޭގައި ޖޭއެސްސީ އިން އިޙުސާން ސަސްޕެންޑު ވެސް ކުރި އެވެ.

އެކި އެކި މީޑިއާ ތަކުގައި ރިޕޯޓު ކޮށްފައިވާ ގޮތުގައި އިޙުސާން މަޤާމުން އިސްތިއުފާ ދެއްވާފައި މި ވަނީ، އޭނާ ވަކިކުރުމަށް ޖޭއެސްސީ އިން ރައްޔިތުންގެ މަޖިލީހަށް ހުށަހަޅަން ނިންމާފައި ވަނިކޮށެވެ.