ޖޫނިއާ ނެޓްބޯޅަ ޗެމްޕިއަންޝިޕްގައި އެންމެ ކާމިޔާބީ އެން ސްޕޯޓްސް

ނެޓްބޯޅަ އެސޯސިއޭޝަން އޮފް މޯލްޑިވްސް (އެންއޭއެމް) އިން އިންތިޒާމުކޮށްގެން ސިންތެޓިކް ނެޓްބޯޅަ ކޯޓުގައި ކުރިއަށްދިޔަ ބީއެމްއެލް 4 ވަނަ ޖޫނިއާ ނެޓްބޯޅަ ޗެމްޕިއަންޝިޕްގެ ތިން އުމުރުފުރާއެއްގެ ޗެމްޕިއަންކަން އެން ސްޕޯޓްސް އެކަޑަމީ ހޯދައިފި އެވެ.

މި މުބާރާތުގެ 17 އަހަރުން ދަށުގެ ބައިގެ ޗެމްޕިއަންކަން އެން ސްޕޯޓްސް ހޯދީ ފައިނަލުގައި ފިއޯންތީ ސްޕޯޓްސް އެކަޑަމީއާ ވާދަކޮށް 17-6 އިން މެޗު ކާމިޔާބުކޮށްގެންނެވެ. މި މެޗުގެ މޮޅު ކުޅުންތެރިޔަކީ އެން ސްޕޯޓްސްގެ އާއިޝާ އައިލީން އަހުމަދެވެ.

މުބާރާތުގެ 15 އަހަރުން ދަށުގެ ޗެމްޕިއަންކަން ހޯދީ ފިއޯންތީ ސްޕޯޓްސް އެކަޑަމީ އެވެ. އެ ޓީމުން ވަނީ ފިއޯންތީ ސްޕޯޓްސް ކްލަބާ ވާދަކޮށް 17-10 އިން މެޗު ކާމިޔާބުކޮށްފައެވެ. މި މެޗުގެ މޮޅު ކުޅުންތެރިޔަކަށް ހޮވުނީ ފިއޯންތީގެ އިންޝާ ބިންތި ޝިހާބެވެ.

މީގެއިތުރުން، 13 އަހަރުން ދަށުގެ ޗެމްޕިއަންކަން އެން ސްޕޯޓްސްއިން ހޯދީ ފިއޯންތީއާ ވާދަކޮށް 9-8 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކީ ފާތިމަތު މަލްކިޔާ ޒަމީރެވެ.

ހަމަ އެއާއެކު 11 އަހަރުން ދަށުގެ ޗެމްޕިއަންކަން ވެސް ހޯދީ އެން ސްޕޯޓްސް އެވެ. އެ ޓީމުން މި މެޗު ކާމިޔާބުކުރީ ފިއޯންތީގެ މައްޗަށް 8-7 ގެ ހަނި ތަފާތަކުން ކުރި ހޯދައިގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ އެން ސްޕޯޓްސްގެ މަރްޔަމް ތަނާލް ޝަހީމެވެ.

މި މުބާރާތުގައި 4 އުމުރުފުރާއަކުން ޖުމްލަ 25 ޓީމު ވާދަކޮށްފައިވެއެވެ.