އާޖެންޓީނާގެ އެންމެ ނުފޫޒުގަދަ ޔުނިވަސިޓީން މެސީ އަށް ޑޮކްޓަރޭޓް ލަގަބު އަރުވަނީ

ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ ލިއޮނަލް މެސީގެ ކާމިޔާބު ކެރިއަރަށް އިތުރު ޝަރަފެއްގެ ގޮތުން، އާޖެންޓީނާގެ އެންމެ ބޮޑު އަދި އެންމެ ނުފޫޒުގަދަ ޔުނިވަސިޓީ ކަމަށްވާ "ޔުނިވަސިޓީ އޮފް ބުއެނޯސް އައިރެސް" (ޔޫބީއޭ) އިން އޭނާއަށް ޝަރަފުވެރި ޑޮކްޓަރޭޓް ލަގަބު "ޑޮކްޓަރ ހޮނޮރިސް ކައުސާ" އެރުވުމަށް ނިންމައިފި އެވެ.

މިއީ ކުޅިވަރަށް މެސީ ކޮށްދީފައިވާ އާދަޔާހިލާފު ހިދުމަތްތަކާއި، އާޖެންޓީނާގެ މުޖުތަމައަށް އޭނާގެ ސަބަބުން ކޮށްފައިވާ އެދެވޭ އަސަރުތަކުގެ އަގުވަޒަންކުރުމުގެ ގޮތުން ދޭން ނިންމި އެންމެ މަތީ ޝަރަފެވެ. ޖުމްލަ އަށް ފަހަރު ބެލޮންޑޯ ހޯދާފައިވާ އުމުރުން 39 އަހަރުގެ މެސީއަށް މި އެވޯޑު އެރުވުމަށް ހަމަޖެހިފައިވަނީ އަންނަ އަންގާރަ ދުވަހު އެވެ.

މި އެވޯޑު މެސީއަށް އަރުވަނީ ގައުމީ ޓީމަށް އޭނާ ކުޅެދޭ ފަހު މެޗުގައި، ބުއެނޯސް އައިރެސްގެ މޮނިއުމެންޓަލް ސްޓޭޑިއަމްގައި ބެނިންއާ ދެކޮޅަށް ނުކުތުމުގެ ކުރިންނެވެ.

އާޖެންޓީނާއަށް ވޯލްޑް ކަޕާއި ކޮޕާ އެމެރިކާ ހޯދައިދިން ކެޕްޓަން، ގައުމީ ކެރިއަރު ނިންމާލާތީ އޭނާއަށް އަލްވިދާއު ކިޔުމަށް ހާއްސަ ރަސްމިއްޔާތެއް ބޭއްވުމަށްވެސް ރޭވިފައި ވެއެވެ.