ރާއްޖޭގެ ފަތުރުވެރިކަމަށް 54 އަހަރު!

ދިވެހިރާއްޖެއަކީ ކުދިކުދި ރަށްތަކެއްގެ މައްޗަށް ބިނާވެފައިވާ ގައުމަކަށްވެފައި، އެތެރޭގެ ދަތުރުފަތުރާއި ވަސީލަތްތައް ނެތުމުން ފަތުރުވެރިކަމަކީ ރާއްޖޭގައި ކުރިއެރުވިދާނެ ކަމެއްކަމަށް ކުރިން ގިނަ ބަޔަކު ގަބޫލެއް ނުކުރެއެވެ. ނަމަވެސް، މިއަދު ދުނިޔޭގެ ފަތުރުވެރިކަމުގެ މައިދާނުގައި ރާއްޖެއަކީ އެންމެ މަގުބޫލު އަދި ލަގްޒަރީ މަންޒިލެވެ. ކުޑަ ދުވަސްކޮޅެއްގެ ތެރޭގައި ރާއްޖެއިން މި ދާއިރާއިން ހޯދި އާދަޔާހިލާފު ކުރިއެރުމަކީ މުޅި ދުނިޔެއަށްވެސް ލާމަސީލު ނަމޫނާއެކެވެ.

ރާއްޖޭގައި ފަތުރުވެރިކަން ފެށިގެން އައީ އިޓަލީގެ ރައްޔިތެއް ކަމަށްވާ ޖޯޖް ކޯބިން ރާއްޖެ އައި ހިސާބުންނެވެ. އޭނާގެ ލަފާއާއެކު މުހައްމަދު އުމަރު މަނިކާއި، ހުސައިން އަފީފް އަދި ކެރަފާ ނަސީމް ފަދަ ބޭފުޅުންގެ އިސްނެންގެވުމުގެ ދަށުން، ފުރަތަމަ ފަތުރުވެރިންގެ ގުރޫޕު ރާއްޖެ އައީ 1972 ފެބްރުވަރީ 16 ގައި އެވެ. ބާރަ ދުވަހުގެ އެ ދަތުރުގައި އިޓަލީގެ ބައެއް ނޫސްވެރިންވެސް ބައިވެރިވިިއިރު، އެމީހުންގެ ތަޖުރިބާތައް ނޫސްތަކުގައި ލިޔުމުން ރާއްޖެ ދުނިޔެއަށް އެނގިގެންދިޔަ އެވެ.

އޭގެފަހުން ރާއްޖޭގެ އެންމެ ފުރަތަމަ ރިސޯޓު، މާލެ އަތޮޅު ވިހަމަނާފުށި (ކުރުނބާ މޯލްޑިވްސް) ހުޅުވުނީ 1972 އޮކްޓޫބަރު 3 ގައި އެވެ. އެއީ 30 ކޮޓަރިއާއެކު ޖުމްލަ 60 އެނދުގެ ރިސޯޓެކެވެ. އެންމެ ފުރަތަމަ ރިސޯޓު ހުޅުވުނު ތާރީހާ ގުޅުވައިގެން، ކޮންމެ އަހަރެއްގެވެސް އޮކްޓޫބަރު މަހުގެ 3 ވަނަ ދުވަހަކީ "ގައުމީ ފަތުރުވެރިކަމުގެ ދުވަސް" ގޮތުގައި ފާހަގަކުރުމަށް ސަރުކާރުން ނިންމެވީ 2021 ވަނަ އަހަރުއެވެ.

އެންމެ ރިސޯޓަކުން 1972 ވަނަ އަހަރުފެށި މި ސިނާއަތުގައި މިއަދު ފަތުރުވެރިންނަށް ހިދުމަތްދޭ 1,280 ތަނެއްގައި 67،869 އެނދު އަންނަނީ ހިންގަމުންނެވެ. މީގެ ތެރޭގައި 179 ރިސޯޓާއި، 920 ގެސްޓްހައުސް، 16 ހޮޓެލް އަދި 165 ސަފާރީ އުޅަނދު ހިމެނެއެވެ.

ރާއްޖެއަށް ޒިޔާރަތްކުރާ ފަތުރުވެރިންގެ އަދަދުވެސް އަންނަނީ އަހަރަކަށްވުރެ އަހަރެއް އިތުރުވަމުންނެވެ. އެގޮތުން ނިމިދިޔަ އަހަރު 2.2 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މި އަހަރުގެ މިހާތަނަށްވެސް 1.6 މިލިއަން ފަތުރުވެރިން ރާއްޖެއަށް އައިސްފައި ވެއެވެ. މީގެއިތުރުން، ރާއްޖެއިން ވަނީ ވިދިވިދިގެން 7 އަހަރު ދުނިޔޭގެ އެންމެ މަގުބޫލު މަންޒިލް (ވޯލްޑް ލީޑިން ޑެސްޓިނޭޝަން) ގެ ޝަރަފުވެސް ހޯދައިފަ އެވެ.

ފަތުރުވެރިކަމަކީ ރާއްޖޭގެ އިގްތިސާދުގެ މައިބަދައެވެ. ގައުމީ އުފެއްދުންތެރިކަން (ޖީޑީޕީ) ގެ 28 ޕަސެންޓް ހިއްސާކުރަނީ ފަތުރުވެރިކަމުން ކަމަށްވާއިރު، ގައުމަށް ވަންނަ ބޭރު ފައިސާގެ ބޮޑު ބަޔަކީވެސް މި ސިނާއަތުގެ އާމްދަނީ އެވެ.

މި ކާމިޔާބީގެ ސަބަބުން ދިވެހި ރައްޔިތުންގެ ދިރިއުޅުމުގެ ފެންވަރަށް ބޮޑު ބަދަލެއް ވަނީ އައިސްފައެވެ. ސީދާ އަދި ނުސީދާ ގޮތުން ގިނަ އަދަދެއްގެ ވަޒީފާތައް އުފެދި، އާއިލާތަކުގެ އާމްދަނީ އިތުރުވެ، ތައުލީމާއި ސިއްހީ ހިދުމަތްތަކަށް ކުރާ ހަރަދުތަކަށް މަގުފަހިވި އެވެ. އަދި އެއާޕޯޓްތަކާއި، ބަނދަރުތަކާއި މަގުހެދުން ފަދަ އުމްރާނީ ބޮޑެތި މަޝްރޫއުތައް ހިންގުމަށް ބޭނުންވާ މާލީ ވަސީލަތްތައް ހޯދުމުގައިވެސް ފަތުރުވެރިކަމުގެ ދައުރު ބޮޑެވެ. "ވަން އައިލެންޑް، ވަން ރިސޯޓް" ކޮންސެޕްޓާއި ދިވެހިންގެ އިހްލާސްތެރި މެހެމާންދާރީގެ ސަބަބުން ދިވެހި ސަގާފަތާއި އާދަކާދަތައް ދުނިޔެއަށް ތައާރަފްކުރުމުގެ ފުރުސަތު ވެސް ވަނީ ތަނަވަސްވެފަ އެވެ.

ފަތުރުވެރިކަމަށް 54 އަހަރު ފުރުނުއިރު، ސިނާއަތުގެ މުސްތަގުބަލަށްޓަކައި ލާމަރުކަޒީ އުސޫލުން ފަތުރުވެރިކަން މުޅި ރާއްޖެއަށް ފުޅާކުރުމަކީ މުހިންމު ކަމެކެވެ. ނަމަވެސް، ތިމާވެއްޓަށް ކުރާ އަސަރުތަކާއި ކާބަން ފުޓްޕްރިންޓް ކުޑަކުރުމުގެ ގޮންޖެހުންތަކާ މިއަދު ވަނީ ކުރިމަތިލާންޖެހިފަ އެވެ. އަދި ދުނިޔޭގެ އިގްތިސާދީ ދަތިތަކާއި ބަލިމަޑުކަންކަމުން ރައްކާތެރިވުމަށް އިގްތިސާދު ތަފާތު ދާއިރާތަކަށް ފުޅާކުރުންވެސް މުހިންމެވެ.

ފަންސާސް ހަތަރު އަހަރުގެ ދިގު ދަތުރުން ލިބުނު ފިލާވަޅުތަކާއެކު، ގުދުރަތީ މާހައުލާއި ސަގާފަތް ރައްކާތެރިކޮށްގެން ދެމެހެއްޓެނިވި ގޮތެއްގައި ފަތުރުވެރިކަން ކުރިއެރުވުމަކީ، އަންނަން އޮތް ޖީލުތަކުގެ ހައްގުގައިވެސް ކުރަންޖެހޭ އެންމެ މުހިންމު މަސައްކަތެވެ.