ނުރައްކާތެރިކޮށް ވެހިކަލް ދުއްވާ މީހުންގެ ވަނަވަރު އާންމުކުރަނީ!

އާންމުންގެ ހިތްތަކުގައި ބިރުވެރިކަން އުފެދޭ ގޮތަށް މަގުމަތީގައި ނުރައްކާތެރިކޮށް އުޅަނދު ދުއްވާ މީހުންގެ ވަނަވަރު އާންމުކޮށް، އިތުރު އިންޒާރަކާ ނުލައި އެފަދަ މީހުންނާމެދު ޖިނާއީ ތަހުގީގެއް ހިންގުމަށް ފުލުހުންގެ ހިދުމަތުން ނިންމައިފި އެވެ.

ފުލުހުން މިއަދު ނެރުނު ބަޔާނެއްގައި ބުނީ، މަގުމަތީގައި ނުރައްކާތެރިކޮށް އުޅަނދު ދުއްވާ މީހުން ދެނެގަނެ، އެ މީހުންގެ މައުލޫމާތު ޕްރޮފައިލްކުރުމުގެ ހާއްސަ މަސައްކަތްތަކެއް ފަށާފައިވާ ކަމަށެވެ. އަދި ފުލުހަށް ހާޒިރުކޮށް ނަސޭހަތްތެރިވުމަށްފަހު ވެސް އެ އަމަލުތައް ތަކުރާރުކުރާ ފަރާތްތަކާމެދު، ކުރިން ކުރަމުން އައި ޖޫރިމަނާގެ އިތުރުން ޖިނާއީ ތަހުގީގު ހިންގާނެ ކަމަށް ބުންޏެވެ.

ފިޔަވަޅު އަޅާނެ ކަންކަމުގެ ތެރޭގައި:

• ނުރައްކާތެރި އަމަލުތައް: ޒިގްޒެގްކޮށް ދުއްވުމާއި، ސައިލެންސަރު އަޑުގަދަކުރުމާއި، ގާނަމުން ދުއްވުމުގެ އިތުރުން ބަމްޕަރުތަކަށް މަޑުނުކޮށް ބާރަށް ދުއްވުން.

• ގަވާއިދާ ހިލާފުވުން: ހުއްދައާ ނުލައި ރޭސްޖެހުމާއި، މަސްތުގެ ހާލަތުގައި ދުއްވުމާއި، ފުލުހުން މަޑުކުރަން އެންގުމުން ފިލަން މަސައްކަތްކުރުން.

• އުޅަނދާއި ވެރިފަރާތް: ނުރައްކާތެރިކޮށް ދުއްވާ އުޅަނދުތައް 30 ދުވަހަށް ފުލުހުންގެ ބެލުމުގެ ދަށަށް ގެންދެވޭނެއެވެ. އަދި ކަނޑައެޅިފައިވާ މުއްދަތުގައި ހަވާލުނުވާ އުޅަނދުތައް ނައްތާލެވޭނެ.

މީގެއިތުރުން، އެފަދަ އަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާނަމަ، އެ ފަރާތްތަކާމެދު އިދާރީ ފިޔަވަޅު އެޅުމަށް އެ މުއައްސަސާތަކަށް މައުލޫމާތު ހިއްސާކުރާނެ ކަމަށް ފުލުހުން ބުންޏެވެ.

މީގެ އިތުރުން އާންމުން ހިއްސާކުރާ ފޮޓޯއާއި ވީޑިއޯގެ ސައްހަކަން ކަށަވަރުކުރުމަށްފަހު، އެ އަމަލުތައް ތަކުރާރުކުރާ މީހުންގެ ވަނަވަރު އާންމުކުރާނެކަމަށް ވެސް ފުލުހުންގެ ބަޔާނުގައި ވެއެވެ.