ޝަމްއާންގެ 25 އަހަރުގެ ޖަލު ހުކުމް އިސްތިއުނާފް ކުރަން ހައި ކޯޓަށް

އިމިގްރޭޝަންގެ ކޮންޓްރޯލަރުގެ މަގާމުން ވަކިކުރި މުހައްމަދު ޝަމްއާން ވަހީދު 25 އަހަރަށް ޖަލަށްލާން ކްރިމިނަލް ކޯޓުން ކުރި ހުކުމް، އޭނާގެ ފަރާތުން ހައި ކޯޓުގައި އިސްތިއުނާފުކޮށްފި އެވެ.

ދައުލަތާ ދެކޮޅަށް ހުށަހެޅި މި މައްސަލަ ބަލައިގަތުމާމެދު ހައި ކޯޓުން އަދި ވަކި ގޮތެއް ނުނިންމަ އެވެ.

ޝަމްއާންގެ މައްޗަށް ދައުލަތުން ތިން ދައުވާއެއް ކުރީ އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށްފަހު، އޭނާގެ އަތުން އަތުލި 500،000 ރުފިޔާ އިމިގްރޭޝަންގެ މުވައްޒަފުންތަކެއް މެދުވެރިކޮށް ޝަމްއާންގެ ގެއަށް ގެންދިޔަ މައްސަލައެއްގަ އެވެ.

ޝަމްއާންގެ މައްޗަށް ކްރިމިނަލް ކޯޓުން ސާބިތުވާ ކަމަށް ނިންމި ދައުވާތަކާއި ދިން އަދަބުތަކަކީ، މަނީ ލޯންޑަރިންގެ ދައުވާއަށް 15 އަހަރުގެ ޖަލު ހުކުމަކާއި، ފޭރުމުގައި ބައިވެރިވުމުގެ ދައުވާއަށް 8 އަހަރުގެ ޖަލު ހުކުމެއްގެ އިތުރުން ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާއަށް 2 އަހަރުގެ ޖަލު ހުކުމެކެވެ.

ޝަމްއާން 25 އަހަރަށް ޖަލަށް ލާން ހުކުމް ކޮށްފައި ވަނީ މިދިޔަ ޖޫން މަހުގެ 9 ވަނަ ދުވަހު އެވެ.

މި މައްސަލައިގެ ތަހުގީގާއި ޝަރީއަތުގެ މަރުހަލާގައި ޝަމްއާން ބަންދުގައި ހޭދަކުރި 9 މަހާއި 10 ދުވަސް ހުކުމުގެ މުއްދަތުން އުނިކުރަން ކޯޓުން ވަނީ އަންގައިފަ އެވެ.

ޖަލު ހުކުމުގެ އިތުރުން، ޝަމްއާން 500،000 ރުފިޔާއިން ޖޫރިމަނާކުރުމާއެކު، ބިދޭސީ މީހާގެ އަތުން ފޭރުނު 500،000 ރުފިޔާ ތިން މަސްދުވަހުގެ ތެރޭގައި އެމީހާއަށް އަނބުރާ ދެއްކުމަށްވެސް ވަނީ ހުކުމްކޮށްފަ އެވެ. އަދި އޭނާގެ ގެއިން ފެނުނު ފައިސާގެ ތެރެއިން 125،000 ރުފިޔާއަށްވާ ފައިސާ ދައުލަތަށް ނެގުމަށްވެސް ކްރިމިނަލް ކޯޓުގެ ހުކުމުގައިވެ އެވެ.