މަދު ވަގުތު ކޮޅެއްގެ ތެރޭގައި ދޮންކަލޯ އަށް އެހީވުމަށް މިލިއަނަކަށް ވުރެ ގިނަ ރުފިޔާ

ފައްޔާހް ޙަސަން ފަޔާޒް ނުވަތަ ދޮންކަލޯ އަށް އެހީވުމަށް ޓިކްޓޮކްގައި ކުރިއަށް ގެންދިޔަ ފަންޑް ރައިސިން ހަރަކާތުން 1.2 މިލިއަނަށް ވުރެ ގިނަ ރުފިޔާ ހޯދައިފި އެވެ.

ބުރާސްފަތި ދުވަހުގެ ރޭ މި އިވެންޓު ކުރިއަށް ގެންދިޔައީ ދޮންކަލޯގެ ބައްޕަ ފަޔާޒް ހަސަންގެ ޓިކްޓޮކް އެކައުންޓުން ލައިވް ކޮށްގެންނެވެ. ޓިކްޓޮކްގައި މަޝްހޫރު މަރިޔަމް ސަމާ އާއި އެހެނިހެން ފަރާތްތަކެއް ގުޅިގެން ކުރިއަަށް ގެންދިޔަ މި ހަރަކާތުގައި އެތައް ހާސް ބަޔަކު ބައިވެރިވި އެވެ.

ހާއްސަ އެޙީއެއް ބޭނުންވާ ދޮންކަލޯ ގޮވައިގެން ދިރިއުޅެމުން އަންން ފަޔާޒް އާއި އޭނާގެ ދަރިފުޅު ދޮންކަލޯ އަށް އެތައް ބަޔަކު އެހީތެރިކަން ދީފައިވެ އެވެ. ދޮންކަލޯގެ ވާހަކަ ސަމާލު ކަމަށް އައީ އޭނާގެ ބައްޕަ ފަޔާޒް އޭނާގެ ދަރިފުޅުގެ މައްޗަށް ހިތުގައި އޮތް ހާއްސަ ލޯއްބާއި ބަހައްޓާ ގާތްކަމާއި އޯގާތެރިކަން ފެންނަ ވީޑިއޯތަކަކުންނެވެ.

މި އިވެންޓުގައު މަދު ވަގުތު ކޮޅެއްގެ ތެރޭގައި މިލިއަނަށް ވުރެ ގިނަ ފައިސާ ހޯދިއިރު، މި ފައިސާއަކީ ދޮންކަލޯ އަށް އޭނާގެ ބައްޕަ ބޯހިޔާވަހިކަން ހޯދައިދޭން ކުރަމުން ގެންދާ މަސައްކަތުގައި އެހީވުމުގެ ގޮތުން ޓިކްޓޮކް ކޮމިއުނިޓީން އިސްނަގައިގެން ކުރިއަށް ގެންދިޔަ އިވެންޓެކެވެ. އަދި މިފަދަ އިވެންޓެއް ކޮންމެ އަހަރެއްގެ އޮކްޓޫބަރު 1 ވަނަ ދުވަހު، ކޮންމެވެސް އެއް ފަރާތަކަށް އެހީތެރިކަން ފޯރު ކޮށްދޭން ކުރިއަށް ގެންދަން ނިންމާފައިވާކަން މި ލައިވްގައި އެ ކޮމިއުނިޓީގެ މެމްބަރުން ވަނީ ހާމަ ކޮށްފަ އެވެ.